(10 декабря 2018) Нийсса 50 шу хьалха дIайолаеннай йоазонхочун Албогачиев Зархмата Мусай кхоллама юхьиг. 1968 шера Шолжа-ГIалий тIа кепа теха арадаьнна хиннад цун хьалхара книжка. «ТалгIи» яхаш цIи а йолаш, баьццара бос болаш, диткъа книжка дар из.
Цу тIа дар поэта сурт а. Цох иштта цIи тиллар цаховш нийсденна хIама дацар.
Дукха ха йоацаш, Тихий океана тIа лелача форда кемаш тIа амал деш хинна, цIавена хиннав Муса, цудухьа книжка цIи а цун чулоацам а из ха дагайохийташ ба. «ТалгIи» яхаш стихотворени я цунна юкъе. Из а деррига книжка а эрсий меттала яздаь хиннад. Керттерча стихотворене («ТалгIи») таржам иштта дек гIалгIай меттала:
« Диъ ди-м бац кIезига низ,
Диъ денна халхар ду херже,
Цкъа – танго, цкъа твист хул из,
Кхаьчав мотт паччахьа дарже.
Декаш хоз кеман гата,
Фордаца латтача довне,
Хозаш да талгIен тата,
Са Iуйре хул цунца зовне.
Михьарйоал, гIатта лайна,
Ширача даьйх йиса талгIи,
Са гIозал дIаяргья яйна,
Цун сийна куц-сибат талхе.
Цох лаьца дувца отте,
Эрсаша кхеллача метта,
Тхо шаккхе даьд цхьан мотте,
Ди хержа хозагIча бетта.
Мух лелаш санна пана,
Водаву цо тIаьсках тара,
Корта кIайлу цу хана,
Виге цо веррига кара.
Иштта Тирко-Пхьармато
Детташ хул хийла цIогIа.
Цун акха хий мо дото
Да талгIех хинна догIа».
Цу тайпара хиннай Албогачиева кхоллама юхьиг. Из беркате хиннай ала а мегаргда. Цул тIехьагIа, Москвера М. Горьке цIерагIа литературни институт а яьккхе, дуккхача шерашка журналиста болх бу цо газеташка а журналашка а. ХIаьта а йоазонхочун никъ биц ца беш, керда йоазош кхоллаш, чакхвоал из. Царна кепа йийттай вайцига санна Москве а.
Муса ше тахан воацаш ва, из вайцара къаьстар укх шера Iай.
С. Арчаков
