(4 октября 2018) ДIадахача кIира, ховш ма хиллара, ГIалгIай Мехка ена хилар лаьтта леладера политикахи, Iаламах пайда эцарахи йолча Федерацен Совета комитета тоаба: Митин Сергей, Ахметзянов Индус, Гигель Татьяна, кхыбараш а. Царца ГIалгIай мехкара сенатор Хамчиев Билан а хилар.
Цар гучдаьккхар шоаш гIадбаха хилар, вай мехка сомий бешамаш лелаера болх дегIабоагIаш. Зераташ даь баьлча, депутатшца хиннача кхетаче цар дийцар вай мехка а, иштта ерригача Россе а сомий бешамаш лелаера болх дIабахьара дола кхоачамбоацараш а, из дегIабоалабар а.
ВIашагIкхетаре белгал ма даккхара, вайцигарча Iаламо а климато а таро лу молхаш дукха ца етташ Iажаш а, кхы йола сомий гаьнаш а лелае. ТIаккха хьабоаккха сом а, шийгахьа дукхах пайда болаш хургба.
Иштта депутатий цхьа барт болаш, уйла сацар дар: сомий бешамаш лелаера болх паччахьалкхен лерхIаме долча гIулакхех цаI хила дезалга. Цу хьаькъе шоай лаьттан чIегалгаш тIа къахегаш болчарна гIо де дезаш долга дийцар, хий, ток, дика наькъаш, дIайогIа гаьнаш, сомий ги лоаттадеш. Из деррига вIаштIехьдоаккхаш, федеральни а мехка а законаш тIаэца дезаш да.
Дика хургьяр сомий гаьнаш лелаера терко тIаяхийта йолаш, вай мехка кхы гаьна а ца доаккхаш садоводаш кийчбеш йола курсаш хьайийллача. Уж хIанза а безача хана хьабеха корабоагIаш бац. Сомий бешамаш дIаяржача-м, хIета а, эшарг ба уж, хIанзарча замах эшаш бола программисташ санна. Иштта сатусвсаш хургда вай, селла сомий гаьнаш лелаера гIулакха айтта лелаш депутаташ хилча, цунга хьажжа, хьасовбаьнна сом бовргбоацаш, бахача наха зе а хургдоацаш, из бахьа моттиг хилар вай мехка! Цхьабакъда, бохка вIаштIехьа ца доале а, кхы вIалла деце баа сом мукъагIа ма хургбий вай шунаш тIа дукха мах луш ийбе ца безаш, унахцIена а болаш.
